Гісторыі дзіўнага свету в городе Минск

ГІСТОРЫІ ДЗІЎНАГА СВЕТУ

15 студзеня, 19.00

Праект Цэнтра беларускай драматургіі і Рэспубліканскага тэатра беларускай драматургіі

Жанр: чытанне п'есы

Драматург: Алена Папова

Пераклад: Анастасія Васілевіч

Працягласць: 1 г. 30 хв. без антракту

16+

Цэнтр беларускай драматургіі запрашае на тэатралізаванае чытанне п'есы "Гісторыі дзіўнага свету” Алены Паповай.

“Гісторыі дзіўнага свету” – трыптых з маленькіх п’ес "Дуй!”, "Пячора Цыклопа” і "Дрэва”. Усе яны прасякнуты экзістэнцыйным настроем і прагай герояў да лепшага жыцця. Аднак ці існуе гэта лепшае жыццё альбо наша рэчаіснасць – самае каштоўнае? Сапраўды дзіўныя гісторыі пра іншапланецяніна, магічную пячору і незнаёмца-трыксцера пераўтвараюцца ў сучасныя прытчы. Містычная атмасфера, нябачныя рэчы і космас – усё гэта можна знайсці ў п’есе Паповай.

Алена Папова – знакаміты беларускі драматург і празаік, лаўрэат тэатральнай Прэміі імя К. Крапівы. Яе п’есы ставіліся ў тэатрах Беларусі, Расіі, Украіны, Кыргызстана, Германіі, Швейцарыі, Эстоніі, Вялікабрытаніі, Японіі. Яшчэ ў 1994 годзе Алена Папова стала пераможцай Першага Еўрапейскага конкурсу п'ес, а яе драматургічныя творы неаднаразова траплялі на розныя тэатральныя фестывалі і конкурсы.

Сцэнічнае чытанне п'есы – тэатралізаваная прэзентацыя п'есы, «правобраз» спектакля. Акцёры чытаюць тэкст з ліста.

Чытанне адбудзецца на беларускай мове.

Ролі выконваюць: заслужаная артыстка РБ Людміла СІДАРКЕВІЧ, Сяргей ШЫМКО, Канстанцін ВОРАНАЎ, Сцяпан КРАЎЧУК, Дар’я ЛАЗАРЧЫК.

Чытанне адбудзецца ў межах праекта “РЭТРАСПЕКТЫВА”.
“Рэтраспектыва” – праект Цэнтра беларускай драматургіі, падчас якога адбудуцца чытанні п’ес 1990-х, 2000-х і 2010-х гадоў. Драматургі заўсёды прапаноўваюць актуальныя для свайго часу праблематыку, герояў і формы тэкстаў. Экспрэс-рэтраспектыва дазваляе ўбачыць як адрозненні, так і падабенства п’ес розных гадоў. На працягу некалькіх месяцаў са сцэны прагучаць тэксты Алены Паповай, Сяргея Гіргеля і Аляксандра Савухі.